Ish-futbollisti i Maqedonisë së Veriut, Goran Pandev ka varur këpucët në moshë 39-vjeçare.
Sulmuesi anësor pjesën më të madhe të karrierës së tij e kaloi në Itali, dhe ishte një nga lojtarët kryesor te Interit kur ata e fituan Ligën e Kampionëve në 2010, të drejtuar nga Jose Mourinho.
“Pas 20 vitesh ka ardhur koha që të ndalem. Djali im i madh është pothuajse 13 vjeçar. Tani dua t’i kushtoj më shumë vëmendje familjes sime, por kjo nuk do të thotë se do të largohem nga futbolli, sepse nuk di të bëj asgjë tjetër.
Unë shikoj prapa dhe nuk më duket e vërtetë. Ka qenë një udhëtim i mahnitshëm me emocione fantastike që mbaj dhe ndaj me ata që kam takuar në këtë rrugë. Dua të falënderoj familjen time, gruan dhe fëmijët e mi”, nënvizoi Pandev.
Karrierën e ka nisur në Belasica, e më pas ka luajtur për Interin, Spezian, Ankonën, Lazion, Napolin, Galatasarayn, Genoan dhe Parmën. Për kombëtaren e Maqedonisë së Veriut ka luajtur në 122 ndeshje dhe ka shënuar 38 gola.