Greva e minatorëve të Trepçës ka përfunduar në ditën e 10-të pas arritjes së marrëveshjes ndërmjet minatorëve dhe zyrtarëve të Ministrisë së Ekonomisë.
Marrëveshja është arritur në orët e vona të mbrëmjes së të enjtes, kur ata u vizituan nga deputetë të VV-së, përfaqësues të Bordit të ndërmarrjes Trepça dhe Ministrisë së Zhvillimit Ekonomik.
Kështu ka konfirmuar edhe Sindikata e Pavarur e Minatorëve të Trepçës, të cilët thonë se me anë të kësaj marrëveshje legjitimohen kërkesat e minatorëve dhe greva e tyre 10 ditore, si reagim i drejtë dhe mesazh i qarë se situata në Trepçë duhet të ndërrojë njëherë e përgjithmonë.
“Deputetët që negociuan këtë marrëveshje së bashku me Bordin e Përkoshëm Mbikqyrës të ndërmarrjes janë garantuesit dhe zbatuesit e marrveshjes së shkruar dhe dakordances se të katër pikat e marreveshjes do të realizohen”, thuhet në njoftimin e Sindikatës.
Gjithashtu, është bërë e ditur se minatorët janë zotuar që do të jenë bashkëpunëtorë dhe promotorë për të ngritur sukseset dhe për të rritur prodhimin e ndërmarrjes, me punë, përgjegjësi dhe përkushtim.
“Greva zgjati shumë. Minatorët nuk u dorëzuan. Shpresa për ditë më të mira u kthye. Por minatorët nuk do të harrojnë asgjë. Kjo grevë është dëshmia më e mirë se mbrojta e të drejtave dhe kërkesa për realizimin e tyre nuk është diçka e pamundur, se vullneti i shumicës dhe këmngulja në të drejtat e tyre do jetë faktori determinues për ditë më të mira për minieren, shoqërinë dhe vetë shtetin”.
Gjatë kësaj kohe sa ishin në grevë, shumë minatorë kishin probleme shëndetësore.
Lidhur me këtë situatë, opozita në Kuvend kishte kërkuar miratimin e një rezolutë në ndihmë të minatorëve, por që nuk ishte mbështetur nga mazhoranca./teve1.info/
