Punonte si pilot në KFOR.
Por kjo nuk ishte e vetmja punë që ushtari nga Kroacia J.I. kryente.
Kjo pasi ai dyshohet se gjatë shërbimit, i kishte dhënë informacione të dashurës së tij Ana Murganiq, mbi lëvizjet e trupave paqeruajtës, e cila më pas i kishte përcjellë këto të dhëna te Lista Serbe.
Për dyshimet për spiunazh, Murganiq dhe J.I. u është caktuar masa e paraburgimit për një muaj nga Gjykata e Qarkut në Split.
Ata janë lënë në paraburgim për shkak të mundësisë së ndikimit mbi dëshmitarë dhe rrezikut të shkatërrimit të provave, thuhet në vendimin e masës së gjykatës.
Madje sipas medias korate “Index”, serbja e dyshuar është lënë në mbajtje për shkak edhe të rrezikut për arrati meqë në Kroaci është shtetase e huaj.
Sipas mediave korate, Murganiq kishte punuar në UNMIK e EULEX dhe ka pasur lidhje me gjyqtarë e prokurorë të këtyre misioneve,
Se ka qenë pjesë e tyre e ka konfirmuar për televizionin edhe Misioni i BE-së për Sundim të Ligjit, EULEX.
“EULEX-i në Kosovë është në dijeni të raporteve të medias që përfshijnë një hetim kundër një ish-anëtari të Misionit EULEX. Misioni aktualisht nuk është në gjendje të komentojë më tej mbi rastin”, thuhet nga misioni i BE-së.
Sipas “Indexit”, i dyshuari i dha informacione partneres së tij mbi lëvizjet e serbëve në veri të Kosovës që nga fundi i vitit 2022 deri këtë vit, ashtu si edhe për lëvizjet e trupave të KFOR-it.
Mes tjerash, hetuesit dyshojnë se ai i zbuloi asaj informacione të rëndësishme lidhur me Zubin-Potokun, një prej komunave problematike mes serbëve e shqiptarëve të Kosovës në veri.
Të dy po ashtu akuzohen për shkëmbim informacionesh lidhur me transportin e serbit të arrestuar Dejan Pantiq, ish-polic i Kosovës, i cili akuzohet për pjesëmarrje në sulmet ndaj zyrave të KQZ-së në Mitrovicën e Veriut.
Për këtë ka reaguar edhe president kroat, Zoran Milanoviq, i cili mes tjerash tha se pret një hetim efikas që do të përcaktojë të gjitha faktet relevante.
“Shpreh mbështetje për të gjitha institucionet e Republikës së Kroacisë, kryesisht VSOA-n, të cilat përmes veprimeve të tyre kanë identifikuar kryerjen e mundshme të veprave penale në dëm të Republikës së Kroacisë dhe kanë marrë masat e duhura për të identifikuar autorët e mundshëm dhe për të parandaluar vepra të mëtejshme penale”, ka thënë presidenti kroat.
E shpërndarja e informacioneve konfideniale sipas ekspertit të sigurisë, Refki Morina dëmton sigurinë nacionale por edhe ndërkombëtare.
Për këtë ai kërkon kujdes më të shtuar nga institucionet e sigurisë.
“Ky rast është një sinjal i institucioneve vendore dhe ndërkombëtare të sigurisë që te kenë kujdes sidomos të zyrtarët të cilët punojnë me informacione te koduara ose informacione sekrete në mënyrë që ata të kontrollohen vazhdimisht nga këto institucione dhe te kenë në veprim vazhdimisht institucion kundër zbulimit në mënyrë që te kenë në kontroll këta persona pasi informacione sekrete mund të barten jashtë institucionit të sigurisë”, thotë Morina.
Të dy të dyshuarit janë intervistuar të mërkurën, ndërsa rasti i tyre po hetohet nga Policia dhe Europoli.
Sipas Kodit Penal në Kroaci, për veprën penale të spiunazhit parashikohet një dënim nga gjashtë muaj deri në pesë vjet burg.
