Spitali i Përgjithshëm “Dr. Sami Haxhibeqiri” në Mitrovicë ka mbetur pa furnizim me energji elektrike si pasojë e një defekti në trafon e qytetit, në të cilën është i lidhur ky institucion shëndetësor.
Sipas njoftimit zyrtar të spitalit, për shkak të ndërprerjes së rrymës, disa reparte aktualisht janë pa energji elektrike, ndërsa funksionimi i pjesëve vitale është siguruar përmes gjeneratorëve.
“Për shkak të një defekti në furnizimin me energji elektrike në trafon e qytetit, në të cilën është i lidhur Spitali, aktualisht disa reparte janë pa energji elektrike. Pjesët vitale të Spitalit janë të furnizuara përmes gjeneratorëve. Ekipet e KEDS-it janë në terren dhe po punojnë për sanimin e defektit, ndërsa rikthimi i furnizimit me energji elektrike pritet shumë shpejt”, thuhet në njoftimin e spitalit.
Nga spitali bëhet e ditur se ekipet e KEDS-it janë duke punuar në terren për eliminimin e defektit dhe se furnizimi me energji elektrike pritet të rikthehet në kohë të shkurtër.
