Gazetari Florent Zeqaj mbrëmë në emisionin “Këndi i Debatit” në Tëvë1, duke u bazuar në të dhënat “nga një personel mjekësor”, deklaroi se në Spitalin e Pejës ka mungesa të barnave esenciale.
Madje, ai tha se nuk punojnë ngrohëset brenda objektit dhe pacientët janë të detyruar të marrin mbuloja me vete.
“Po më shkruajnë prej Peje, 30% e barnave esenciale mungojnë në Spitalin e Pejës, ngrohëse nuk ka, pacientët mërdhijnë, mbulojat duhet me i marrë prej shtëpie. Ky është personal mjekësor”, deklaroi ai mbrëmë.
Ndërkohë, lidhur me këtë deklaratë ka reaguar Spitali i Pejës, deklaratë, të cilën e demenaton.
Në reagimin publik të Spitalit thuhet se objekti ka ngrohje moderne dhe funksionale në çdo repart dhe zyrë.
“Spitali i Përgjithshëm në Pejë ka sistem ngrohjeje modern dhe funksional në çdo repart dhe çdo zyrë. Edhe pse aktualisht temperaturat janë të larta, ngrohja është e aktivizuar dhe në gjendje të rregullt pune. Këtë e dinë shumë mirë mbi 550 punëtorë të spitalit dhe mbi 200 pacientë të shtrirë dhe mbi 2.000 pacientë e qytetarë që në një ditë hyjnë në spital”, thuhet në reagim.
Ndërkaq, sa i përket barnave esenciale, në njoftim është bërë e ditur se furnizimi është i rregullt dhe i qëndrueshëm, duke mbuluar rreth 85-90% të listës.
“Mungesat janë të rralla dhe periodike, e në rastet kur ndonjë preparat mungon, ne menjëherë i drejtohemi Shërbimit Spitalor Klinik Universitar të Kosovës (SHSKUK) për furnizim plotësues, në mënyrë që pacientët të mos privohen nga trajtimi i nevojshëm”, thuhet mes tjerash. /teve1.info/
