Vizita e resorit turistik të Prevallës dhe banjat që janë në Kosovë, po rekomandohen që të vizitohen nga spitale e mjekë të shteteve të Evropës për arsye shëndetësore.
Këtë e ka thënë kryetari i Unionit të Turizmit të Kosovës, Baki Hoti.
Ai në emisionin “Ditari” në Tëvë1, ka thënë se nuk po bëhet sa duhet për të promovuar këto resore turistike, ndonëse ka bërë të ditur se numri i turistëve që po vizitojnë Kosovën po shënon rritje.
“Është pjesa e truizmit shëndetësor që ne shumë pakë e promovojmë, kemi pjesën e Prevallës. Kemi rekomandime nga spitalet nga Zvicra e Gjermania që të vizitojnë këtë pjesë”, ka thënë Hoti.
Poashtu ai ka thënë se ka mjek nga shtetet e huaja që rekomandojnë që t’i vizitojnë banjat e Kosovës.
Ai ka treguar se turizmi malor mbetët më i preferuari nga vizitorët e huaj në Kosovë, duke thënë kjo pjesë ka pasur rritje të turistëve të huaj për këtë lloj turizmi.
Duke folur për statistika ai ka bërë të ditur se në janarin e këtij viti, krahasuar me të vitit të kaluar, ka pasur rritje të turistëve mbi 50.8 për qind.
“Nëse e krahasojmë vitin 2023 me atë 2022, Kosova ka pasur një rritje prej 8.4 për qind të numrit të turistëve ndërkombëtarë, çka është jashtëzakonisht pozitive. Nëse e krahasojmë janarin e këtij viti me atë të vitit të kaluar kemi mbi 50.8 për qind rritje të ndërkombëtareve që po e vizitojnë Kosovën”, ka thënë ai.
