Ministrja për Evropë dhe Punë të Jashtme e Shqipërisë, Elisa Spiropali, ka reaguar lidhur me zhvillimet e fundit për vendosjen e paqes në Rripin e Gazës, pas vendimit të Hamasit për të liruar të gjithë pengjet izraelite.
Përmes një postimi në rrjetet sociale, ministrja Spiropali e cilësoi këtë moment si një rreze shprese pas dy vitesh pashprese dhe vlerësoi përpjekjet e presidentit amerikan Donald Trump në këtë drejtim.
“Dy vjet pashpresë pas sulmeve të tmerrshme, lajmi i vendimit të Hamasit për të liruar të gjithë pengjet ndez një flakë shprese të brishtë, por të çmuar. Shënoftë agimin e një kapitulli të ri, ku izraelitë dhe palestinezët mund të jetojnë jo në pikëllim paralel, por në paqe dhe dinjitet të përbashkët”, shkroi Spiropali.
Ministrja shtoi se Shqipëria mbështet me vendosmëri çdo hap drejt pajtimit dhe theksoi angazhimin e vendit për paqen rajonale dhe globale.
“Shqipëria e mirëpret këtë hap me zemër të hapur dhe një besim të palëkundur në pajtim, dhe përgëzon përpjekjet e Presidentit Trump që e kanë afruar Lindjen e Mesme me horizontin e paqes së shumëpritur”, theksoi ajo në reagim.
Presidenti Trump, nga ana tjetër, deklaroi të premten se beson që Hamasi është “gati për paqe”, duke shtuar optimizmin ndërkombëtar për një marrëveshje të mundshme.
