Ministrja për Evropën dhe Punët e Jashtme e Shqipërisë, Elisa Spiropali, ka shprehur qëndrim kritik ndaj procesit të Gjykatës Speciale në Hagë, duke kërkuar drejtësi të paanshme dhe pa standarde të dyfishta.
Në konferencën e përbashkët për media me ministrin e Jashtëm të Kosovës, Glauk Konjufca, Spiropali theksoi se Shqipëria respekton drejtësinë ndërkombëtare, por ajo duhet të jetë e plotë dhe e balancuar.
“Shqipëria respekton drejtësinë ndërkombëtare dhe pavarësinë e saj, por drejtësia duhet të jetë e paanshme. Nuk mund të ecë me standarde të dyfishta, nuk mund të prodhojë perceptim se viktima dhe agresori janë në të njëjtin plan”, deklaroi ajo.
Spiropali rikujtoi kontekstin e luftës në Kosovë, duke theksuar se ajo ishte një luftë çlirimtare pas një periudhe të gjatë represioni dhe terrori ndaj popullsisë civile.
“Lufta e Kosovës nuk ishte për pushtet, ishte luftë për mbijetesë dhe liri, pas një periudhe të gjatë represioni e terrori ndaj popullsisë civile. Kjo ishte arsyeja pse NATO-ja ndërhyri në Kosovë, për të shmangur një katastrofë humanitare”, u shpreh ajo.
Sipas saj, çdo proces gjyqësor që lidhet me atë periudhë duhet të zhvillohet me vetëdije të plotë për kontekstin historik dhe për krimet e kryera ndaj civilëve.
Ministrja shqiptare theksoi se proceset në Hagë nuk duhet të krijojnë perceptimin e rishkrimit të historisë në mënyrë të pabalancuar.
“Sot në Hagë po përballen me drejtësinë udhëheqësit e luftës. Ne nuk paragjykojmë asnjë vendim, por kemi detyrimin moral dhe historik të themi se drejtësia duhet të jetë e plotë, pa shkelje të standardeve ndërkombëtare, jo drejtësi e pjesshme. Ajo nuk mund të shkëputet nga konteksti i një lufte çlirimtare”, tha Spiropali.
Ajo shtoi se shteti i Kosovës dhe lufta për liri nuk mund të vendosen në bankën e të akuzuarve.
“Kosova si shtet nuk është në gjyq dhe nuk duhet të jetë në gjyq. Lufta për liri nuk është në gjyq, e vërteta historike nuk është në gjyq. Kërkojmë drejtësi që sheh panoramën e plotë, njeh kontekstin dhe historinë, dhe nuk shkel të drejtat e njeriut. Ky nuk është presion, është përgjegjësi ndaj historisë”, përfundoi ajo.
