Kryetarja e Kuvendit të Shqipërisë,Elisa Spiropali ka reaguar mbi incidentin e ndodhur gjatë ndeshjes së basketbollit në Kumanovë
Sipas saj, gjuha që nxit dhunë dhe konflikt etnik, nuk zë vend në asnjë hapësirë publike, e aq më pak në sport.
Ajo ka thënë se vlerëson reagimin e institucioneve të Maqedonisë së Veriut, duke kërkuar reagim më të fuqishëm.
“Gjuha e urrejtjes që nxit dhunën, konfliktin etnik dhe racizmin, nuk ka vend në asnjë hapësirë publike, e aq më pak në sport, që në thelb të tij mbart frymën e bashkimit, të bashkëpunimit, të lojës së ndershme dhe të respektit ndaj tjetrit. Vlerësoj reagimin e institucioneve të RMV, duke kërkuar njëkohësisht reagim edhe më fortë publik të zyrtarëve më të lartë të vendit mik. Bashkëjetesa ndëretnike në Maqedoninë e Veriut është një vlerë e përbashkët në rrugën europiane, që duhet ruajtur dhe kultivuar me përgjegjësi nga të gjithë faktorët në rajon, përmes veprimit, qëndrimeve dhe shembullit”, ka thënë ajo.
Gjatë ndeshjes së basketbollit të luajtur të shtunën mes Maqedonisë së Veriut dhe Rumanisë, një pjesë e tifozëve të pranishëm në sallë shpërthyen me kore antishqiptare.
