Gjykata Speciale në Hagë ka rrëzuar kërkesën e mbrojtjes së ish-presidentit të Kosovës, Hashim Thaçi, për pranimin e deklaratës së një dëshmitari vetëm si provë me shkrim, pa u paraqitur ai në gjykatë.
Vendimi, i marrë në tetor të vitit 2025 në çështjen gjyqësore ndaj Thaçit dhe të tjerëve për krime lufte, u bë publik në versionin e redaktuar më 19 tetor 2026.
Sipas arsyetimit të trupit gjykues, deklarata përmbante informacione lidhur me sjelljen e drejtpërdrejtë të disa të akuzuarve, si dhe me besueshmërinë e dëshmitarëve që kishin dëshmuar më herët gjatë procesit.
Për këtë arsye, gjykata vlerësoi se prania e dëshmitarit ishte e nevojshme, në mënyrë që ai të mund t’u përgjigjej pyetjeve të palës kundërshtare dhe të garantohej drejtësia e procesit gjyqësor.
Në vendim, trupi gjykues theksoi rëndësinë e marrjes në pyetje të dëshmitarit për të shmangur dëmtimin e të drejtave të palëve dhe për të siguruar një proces të drejtë.
Rrjedhimisht, mbrojtjes së Thaçit iu kërkua të ofronte informacionin e nevojshëm për paraqitjen e dëshmitarit në gjykatë, në vend që deklarata e tij të pranohej vetëm në formë të shkruar.
Ndërkohë, aktgjykimi në çështjen ndaj Thaçit dhe të tjerëve lidhur me ndikimin e pretenduar ndaj dëshmitarëve është caktuar të mbahet më 17 nëntor./teve1.info/
