Spanja u zgjua me flamuj në gjysmë shtizë të martën, ndërsa kombi filloi tre ditë zie për viktimat e aksidentit vdekjeprurës hekurudhor në jug të vendit,
Ekipet e emergjencës kanë vazhduar të nxjerrin trupa nga rrënojat, ndërsa numri zyrtar i të vdekurve nga aksidenti i së dielës u rrit në 41 deri të martën në mëngjes, pasi një tjetër kufomë ishte zbuluar kur një vinç ngriti një vagon të dëmtuar, raporton AP.
Zyrtarët kanë paralajmëruar vazhdimisht se numri i të vdekurve mund të rritet, me punonjësit e emergjencës që ende po kërkojnë trupa midis asaj që presidenti rajonal i Andaluzisë, Juanma Moreno, e quajti “një masë e shtrembëruar metalike”.
Aksidenti ndodhi të dielën, kur pjesa e pasme e një treni me 289 pasagjerë në rrugën nga Malaga në kryeqytetin Madrid doli nga shinat. Ai u përplas me një tren që po vinte nga Madridi në Huelva, një qytet tjetër jugor spanjoll, sipas operatorit hekurudhor Adif.
Zyrtarët po vazhdojnë të hetojnë shkaqet e incidentit, ndërsa autoritetet shëndetësore thanë se 39 persona mbetën të shtruar në spital të martën në mëngjes, ndërsa 83 persona u trajtuan dhe u liruan nga spitali.
Shërbimet hekurudhore të martën midis Madridit dhe qyteteve në Andaluzi, rajoni më i populluar i Spanjës, mbetën të anuluara, duke shkaktuar ndërprerje të mëdha.
