Spanca tha se të gjitha auditimet e kryera deri më tani, kanë qenë në përputhje me standardin ndërkombëtar të Institucioneve Supreme të Auditimit.
“Sot në konferencën e mbajtur për media kemi prezantuar kryerjen e punës tonë, e cila ka përfshirë kryerjen e 121 raporteve të auditimit. Prej tyre janë 110 raporte të auditimit financiar dhe pajtueshmërisë, si dhe 11 auditime të përformancës. Jemi në proces të kryerjes së 9 auditimeve të projekteve të financuara nga Banka Botërore si dhe 3 auditime të tjera të përformancës. Auditimet tona janë kryer në përputhje me standardin ndërkombëtar të Institucioneve Supreme të Auditimit”, tha ajo në emisionin “Ditari” në Tëvë1.
Ndërkaq, ajo shtoi se nga 90 auditime të financiarëve të pajtueshmërisë, 46 prej tyre kanë marrë opinione të pamodifikuara ose të pastra.
“Sa i përket rezultateve të auditimit, vlen të theksohet se në 90 auditime të financiarëve të pajtueshmërisë, prej tyre 46 janë opinione të auditimit të pamodifikuara, që do të thotë janë opinione të pastra. Përderisa në 44 organizata buxhetore kemi dhënë opinionin të modifikuar, që do të thotë se nuk ka qenë opinion i mirë, opinion me rezervë, ku 42 prej tyre kanë qenë opinione të kualifikuara dhe 2 opinione të kundërta”, shtoi tutje ajo.
