Trajneri i Juventusit, Luciano Spalletti pritet të bëjë ndryshime në formacion për ndeshjen derbi kundër Napolit, ka shkruar e përditshmja italiane “Il Matino”.
Derbi i xhiros së 14-të në Serie A ndërmjet Napolit dhe Juventusit, do të luhet të shtunën prej orës 20:45 në stadiumin “Diego Armando Maradona”.
Bëhet e ditur se Spalletti po kërkon fitoren me çdo kusht ndaj Napolit, kampionit në fuqi, dhe për këtë arsye do ta ndryshojë formacionin.
Sipas gazetës italiane, Edon Zhegrova mund të jetë befasia e Spallettit kundër Napolit, me futbollistin e Kosovës që pritet të aktivizohet prej fillimit.
Thuhet se Zhegrova është më i favorizuar se portugezi Sergio Conceicao për të qenë startues, sidomos pas paraqitjes së fundit në Kupën e Italisë kundër Udineses, ku 26-vjeçarit i mjaftuan dhjetë minuta për ta elektrizuar atmosferën në tribuna dhe për ta bindur Spallettin se meriton minutazhë më të madhe.
Në rast se Zhegrova është në formacionin startues, atëherë kjo do të ishte ndeshja e parë për të që luan prej fillimit te Juventusi prejse u transferua nga Lille.
Ai deri më tani, ka vetëm shtatë paraqitje në të gjitha garat apo 92 minuta lojë në total, duke u aktivizuar nga banka e rezervistëve në fund të pjesës së dytë.
