Prokuroria e Posaçme, në bashkëpunim me autoritetet gjermane, kanë bërë të mundur goditjen e një grupi kriminal në fushën e mashtrimeve kompjuterike, ku të dëmtuar ishin shtetas kryesisht gjermanë, por edhe nga vende të tjera të Evropës.
Sipas të dhënave zyrtare, 14 shtetas gjermanë janë identifikuar si viktima të skemës, por kishte edhe nga vende të tjera të Evropës, me një dëm financiar prej 363 mijë eurosh.
Rrjeti kriminal vepronte nga Shqipëria, Bosnje-Hercegovina, Libani, Kosova dhe Serbia, ndërsa u identifikuan 12 qendra ndërkombëtare thirrjesh dhe dhjetëra autorë të përfshirë. Në Shqipëri u arrestuan 6 persona (5 meshkuj dhe një grua), të moshave 21 deri në 36 vjeç, ndërsa 2 të tjerë janë ende në kërkim.
Hetimet kanë zgjatur 18 muaj dhe janë zhvilluar paralelisht në Shqipëri dhe Gjermani.
Drejtuesi i operacionit në Gjermani tha se që nga dhjetori 2023 janë përgjuar mbi 20 telefonata mashtruese në ditë, ndërsa policia ngriti një kundër-qendër thirrjesh për t’i ndërprerë në kohë reale, duke parandaluar humbje deri në 10 milionë euro.
Autoritetet theksojnë se qëllimi nuk ishte vetëm arrestimi i personave të përfshirë, por shkatërrimi i plotë i strukturës kriminale që vepronte në disa shtete. /rtsh.al/
