Prokuroria e Posaçme kundër Korrupsionit dhe Krimit të Organizuar (SPAK), në bashkëpunim me agjencitë ndërkombëtare ligjzbatuese, ka goditur një grup të strukturuar kriminal të përfshirë në trafikun e kokainës nga Amerika Latine drejt Evropës dhe në pastrimin e produkteve të veprës penale.
Autoritetet njoftuan këtë të mërkurë ekzekutimin e masave të sigurisë dhe bllokimin e aseteve me vlerë rreth 12 milionë euro.
Hetimi dhe arrestimet
Operacioni, pjesë e procedimit penal nr. 153 të vitit 2023, është zhvilluar në koordinim të ngushtë me Eurojust, Europol dhe autoritetet gjyqësore në Francë, Holandë dhe Mbretërinë e Bashkuar. Më 14 prill 2026, me kërkesë të SPAK, Gjykata e Posaçme (GJKKO) caktoi masën “arrest në burg” për 11 shtetas shqiptarë.
Gjatë ditës së sotme, Byroja Kombëtare e Hetimit (BKH) dhe Policia e Shtetit kanë vënë në pranga tre prej tyre: shtetasit F.M. (34 vjeç), L.P. (52 vjeç) dhe A.K. (33 vjeç).
Policia njofton se operacionet për lokalizimin dhe arrestimin e të dyshuarve të tjerë po vijojnë, pasi një pjesë e tyre besohet se ndodhen jashtë territorit të Shqipërisë.
Aktiviteti kriminal, 8 episode trafiku
Sipas dosjes hetimore, grupi ka vepruar intensivisht gjatë periudhës 2019-2021.
Gjatë kësaj kohe, janë dokumentuar 8 episode të trafikimit të sasive të mëdha të kokainës, me origjinë nga Peruja, Ekuadori dhe Kolumbia, me destinacion kryesor Portin e Roterdamit në Holandë.
Ndër rastet më të theksuara përfshihen: Në prill 2020, trafikimi i 1,018 kg kokainë nga Peruja në Roterdam, e fshehur në lëng frutash të ngrira; qershor 2020, trafikimi i rreth 2,020 kg kokainë nga Ekuadori; në gusht 2020, sekuestrimi i 1,238 kg kokainë e fshehur në një ngarkesë me banane nga Ekuadori drejt Roterdamit.
Sipas hetimeve, lënda narkotike mbërrinte kryesisht përmes rrugëve detare, e maskuar mes produkteve ushqimore me destinacion të deklaruar për kompani në vende të ndryshme evropiane si Hungari, Gjermani apo Suedi.
Sekuestrimi i pasurive
Krahas masave personale të sigurisë, GJKKO ka urdhëruar sekuestron preventive për 232 pasuri të luajtshme dhe të paluajtshme të lidhura në mënyrë të drejtpërdrejtë apo të tërthortë me të dyshuarit.
Lista e aseteve të bllokuara, që kap vlerën e 12 milionë eurove, përfshin:
Biznese- Kuota dhe pasuri të disa shoqërive tregtare, përfshirë “P… GROUP”, “O….. Hotel”, “E…… AL” etj., me seli në Tiranë, Fierzë dhe qarkun e Lezhës.
Pasuri të paluajtshme- 60 prona (toka, hotele, poste parkimi dhe apartamente) në Tiranë, Kamëz, Lezhë, Shëngjin, Sarandë dhe Himarë.
Automjete- 89 mjete, përfshirë autovetura luksi dhe mjete të rënda teknologjike për ndërtim.
Llogari bankare- 72 llogari të personave fizikë dhe juridikë.
Të dyshuarit akuzohen për “Trafikim të lëndëve narkotike” dhe “Pastrim të produkteve të veprës penale”, vepra të kryera në kuadër të grupit të strukturuar kriminal. Agjencia e Administrimit të Pasurive të Sekuestruara ka nisur tashmë procedurat për bllokimin e llogarive dhe pronave pranë institucioneve përkatëse./rtsh.al/
