Profesori i Shkencave Politike, Nexhmedin Spahiu, ka vlerësuar se, pas sigurimit të mandatit të 52-të falë votave nga diaspora, Lëvizja Vetëvendosje mund të arrijë të marrë edhe deputetin e 53-të nga Partia Demokratike e Kosovës, nëse vazhdon trendi aktual i numërimit të votave.
Duke folur në emisionin “Ditari” në Tëvë1, Spahiu ka thënë se votat me kusht nuk pritet të ndikojnë në ndryshimin e rezultatit përfundimtar, pasi ato, sipas tij, pasqyrojnë në masë të madhe përqindjet e votave të fituara nga subjektet politike brenda Kosovës.
“Ka qenë e pritshme që me votat e diasporës të ndryshojë rezultati, duke pasur parasysh traditën që Vetëvendosja gjithmonë ka marrë më shumë vota nga diaspora. Duke marrë parasysh pjesëmarrjen më të ulët të votuesve në Kosovë dhe numrin më të madh të votave nga diaspora krahasuar me zgjedhjet e kaluara, ishte e pritshme që ky trend t’i favorizonte Vetëvendosjes. Tani për tani janë 52 deputetë dhe ka shumë gjasa që deri në fund të numërimit ta marrë edhe deputetin e 53-të nga PDK-ja, nëse ruhet ky trend. Nëse trendi ndryshon, atëherë mund të mbetet me 52 deputetë. Ndërkaq, votat me kusht nuk mund ta ndryshojnë rezultatin, pasi ato reflektojnë përqindjen e votave që ka qenë në Kosovë. Kjo do të thotë se VV-ja mund të marrë rreth 45-46 për qind të këtyre votave, kështu që ato nuk mund ta ndryshojnë përqindjen e partive”, ka deklaruar Spahiu.
Sipas Spahiut, edhe me 52 deputetë, Vetëvendosja do të mund ta formonte qeverinë pa pasur nevojë për koalicion me partitë opozitare shqiptare.
“Me 52 deputetë, Vetëvendosja mund ta formojë e vetme qeverinë, pasi 8 deputetë të komuniteteve joserbe së bashku me deputetin Nenad Rashiq bëjnë gjithsej 9 deputetë. Kjo e çon shumicën në 61 deputetë, duke i mundësuar Albin Kurti të formojë qeverinë dhe të negociojë me partitë e tjera vetëm çështjen e presidentit”, ka thënë ai.
Ndryshe, krahasuar me rezultatin e votimit të rregullt brenda vendit, ku LVV kishte fituar 42.95 për qind, votat e diasporës kanë prodhuar një efekt të dukshëm në shpërndarjen e mandateve, duke i siguruar partisë një ulëse shtesë në Kuvend.
Rezultatet deri tani tregojnë një epërsi të theksuar të LVV-së në votat e diasporës.
Në përfaqësitë diplomatike, partia ka fituar 83.28 për qind të votave, ndërsa në kutitë e numëruara të votimit me postë ka marrë 70.26 për qind./teve1.info/
