Profesori universitar, Nexhmedin Spahiu, ka kritikuar Lëvizjen Vetëvendosje, që nuk e ka përfshi në listën e kandidatëve për deputetë zëvendësministrin e Pushtetit dhe Administrimit Lokal, Arbër Vokrri.
Spahiu ka thënë se nëse veriu është karta më e fortë e qeverisjes së Vetëvendosje, atëherë Vokrri ka qenë akteri kryesor që ka punuar në integrimin e serbëve.
“Përderisa e vetmja gjë për çfarë mund të mburret Vetëvendosje me qeverisjen është veriu në këtë listë mungon akteri i cili ka punu më se shumti në veri në këtë kohë e që është zëvendësministri i Pushtetit Lokal, Arbër Vokrri. Është e habitshme se ai ka qenë një prej 10 themeluesve të lëvizjes “KAN” e më vonë Vetëvendosje. Dështakët janë vu në listë, meritori është lënë jashtë liste dhe kjo është për tu habitur”, ka thënë Spahiu në emisionin “InfoNata” në Tëvë1.
Spahiu ka folur edhe për lënien jashtë listës të ministrit Liburn Aliu.
Sipas Spahiut , Aliu i ka shkaktuar dëme me fjalë e vepra vendit. Por për përfshirjen e disa ministrave në listën e kandidatëve për deputetë, ai ka thënë se në bazë të punës që kanë bërë nuk do duhej të ishin asnjë në listë.
