Diplomati nga Danimarka, Peter Sorensen, do të jetë përfaqësuesi i posaçëm i bllokut për dialogun mes Kosovës dhe Serbisë.
Sorensen është zgjedhur nga përfaqësuesja e lartë e Bashkimit Evropian për politikë të jashtme dhe siguri, Kaja Kallas, për ta zëvendësuar Mirosllav Lajçakun në këtë pozitë.
Lidhur me këtë zëvendësim profesori universitar, Nexhmedin Spahiu, nuk beson se do të ketë ndryshim në rrjedhjen e dialogut.
“Nuk besoj që do to ketë ndryshim të rrjedhjes së dialogut, sepse dialogu ka përfunduar. Marrëveshje veç është bërë dhe ajo nuk po realizohet, për shkakun që palët nuk kanë besim te njëra-tjetra dhe as në ndërmjetësuesin që ta kryejë e para obligimin, sepse ka frikë që pala tjetër pastaj nuk e kryen obligimin nga pjesa e vetë. Në këtë rast, marrëveshja është shumë e qartë”, tha Spahiu në emisionin “Ditari” në Tëvë1.
Por, profesori universitar shpreson që Sorensen do të gjejë rrugë nga vullneti i administratës së presidentit amerikan, Donad Trump, të shtyjë palën kosovare e atë serbe që ta zbatojnë Marrëveshjen e Ohrit.
“Shpresojmë që ky ndërmjetësuesi i ri të gjejë rrugën se si marrëveshja të realizohet njëkohësisht. Më shumë sesa ndërmjetësuesi i ri evropian që më tepër është një person teknik në këtë rast, varet edhe nga vullneti i administratës së presidentit Trump që të shtyjë palët që ta zbatojnë marrëveshjen. Unë shpresoj që administrata Trump do ta bëjë këtë”, tha ai.
Të dërguarit aktual, Lajçak, i skadon mandati më 31 janar. /teve1.info/
