Analisti, Nexhmedin Spahiu takimin e tij të së shtunës me ministrin e Jashtëm të Serbisë, Marko Gjuriq e ka krahasuar me fillimin e luftës kundër Serbisë nga Adem Jashari.
Spahiu në emisionin “Info Nata” në Tëvë1 ka thënë se e ka bërë gjënë e duhur tani ashtu sikurse Adem Jashari e ka bërë atëherë.
“Pse u takuat? Eshtë sikur ta pyesësh Adem Jasharin pse ja ke nisur të luftosh dhe kush të ka autorizuar ty të fillosh luftën kundër Serbisë? Por ai në kohën e duhur e ka bërë gjënë e duhur e edhe unë në kohën e duhur e kam bërë gjënë e duhur. E kam bërë të njëjtin veprim me të njëjtin interes, me të njëjtin qëllim”, ka deklaruar ai.
I pyetur nëse ky është krahasimi i duhur, Spahiu ka thënë se po pasi sipas tij në atë kohë ka qenë sfidë të luftosh për Kosovën, ndërsa tani është sfidë të marrësh njohjen nga Serbia.
“S’duket e pakrahasueshme sepse kjo varet prej kohës në çfarë pozite ka qenë Kosova atëherë. Ka qenë sfidë për Kosovën me luftu për të, me u sakrifiku për të e tash është sfidë për Kosovën me marr njohje ndërkombëtare, me marr njohjen prej Serbisë sepse Kosova deri tani i ka arritur 119 njohje por tani ka ngecur sepse njohjet tjera po varen prej njohjes së Serbisë dhe prandaj e gjithë bashkësia ndërkombëtare e gjithë miqtë tani po na cytin të bëjmë dialog sesi ta arrijmë njohjen prej Serbisë”, është shprehur Spahiu.
