Publicisti nga Mitrovica, Nexhmedin Spahiu ka thënë se pas zgjedhjeve në katër komunat në veri të vendit, të banuara me shumicë serbe, në objektet institucionale do të ngritet flamuri i shtetit të Kosovës.
Ai për Tëvë 1 ka thënë se kjo do të bëhet pasi nga ky proces do të ketë të zgjedhur vetëm shqiptarë dhe boshnjakë.
“Është e qartë se këtu do të ketë të zgjedhur vetëm shqiptarë dhe boshnjakë, nuk do të ketë serbë edhe këto bëhet me një qëllim, që të vendoset flamuri i Kosovës në katër objektet komunale në veri të Kosovës, i cili nuk ka qenë i pranishëm asnjëherë deri më tani. Tani me vendosjen e kryetarëve të rinj do të vendoset sepse nuk do të kishte kuptim që kryetarët dhe asamblistët të betohet me flamurin e Serbisë”, ka thënë ai.
Spahiu ka thënë se gjatë këtij procesi zgjedhor nuk pritet të ketë incidente, por që sfida do të jetë pas zgjedhjeve.
“Në momentin kur të zbresë flamuri i Kosovës dhe të bie ai i Serbisë, kjo do të jetë një sfidë e veçantë, dhe ai pari i cili do të ngreh flamurin e Kosovës në njërin nga këto objekte komunale do të jetë Ismail Qemali i Kosovës”, ka thënë analisti Spahiu.
Por sipas tij, në katër komunat në veri të vendit do të ketë zgjedhje përsëri pas 2 ose 3 muajve dhe se do të ketë një marrëveshje ndërmjet kryeministrit të Kosovës, Albin Kurti dhe presidentit serb, Aleksandar Vuçiq për formimin e Asociacionit dhe kthimin e serbëve në institucione.
