Analisti politik, Nexhmedin Spahiu ka komentuar deklaratat e kryeministrit Albin Kurti lidhur me çështjen e presidentit, duke i cilësuar ato si përpjekje për të ulur “pazarin” me partnerët politikë.
Në emisionin “Info Nata” në Tëvë1, Spahiu ka thënë se deklaratat e Kurtit se është në kontakt me krerët e partive opozitare dhe se “kur ka rezultate do të njoftojmë”, tregojnë se ai po përpiqet t’i sigurojë votat me koston më të ulët të mundshme.
Sipas tij, është e qartë se Kurti synon ta mbajë postin e presidentit për vete, nëse kjo është e realizueshme.
“Thjesht, Kurti po ul pazarin e partnerëve politikë dhe po përpiqet t’i sigurojë ata me sa më pak. Është e qartë se Albin Kurti është i interesuar ta mbajë postin e presidentit për vete, nëse mundet, por nëse nuk mundet, ka ende disa ditë kohë deri në momentin e fundit”, ka thënë ai.
Spahiu gjithashtu ka vlerësuar se partitë opozitare nuk kanë interes të hyjnë në bashkëqeverisje me Lëvizjen Vetëvendosje.
Ai ka shtuar se për to më i rëndësishëm është posti i presidentit sesa pozita të tjera institucionale.
“Është e qartë se asnjë parti opozitare nuk ka interes të hyjë në bashkëqeverisje me VV-në. Ndërkohë, partitë si PDK dhe LDK kanë interes për postin e presidentit, pasi ky pozicion ka më shumë peshë politike”, ka shtuar Spahiu.
Lidhur me deklaratat e Vetëvendosjes për një kandidat konsensual dhe jo partiak, Spahiu i ka cilësuar ato si taktika për të rritur vlerën e negociatave.
Sipas tij, në Kosovë është pothuajse e pamundur të gjendet një emër i tillë.
“Deklaratat se duan emër konsensual, jo partiak, janë shtesa për ta çuar pazarin sa më lart; pra janë lojëra, sepse në Kosovë nuk mund të gjendet një emër konsensual, kurrë nuk është gjetur. Atifete Jahjaga është tjetër gjë, pasi u imponua nga amerikanët dhe nuk kanë guxuar të lëvizin,” ka përfunduar Spahiu.
Ndryshe, zëvendëskryeministri i parë, njëherësh ministri i Jashtëm dhe Diasporës i Kosovës, Glauk Konjufca, të mërkurën tha se çështja e zgjedhjes së presidentit të ri të vendit varet nga vullneti i partive opozitare.
Konjufca tha se do të tërhiqte kandidaturën për president, nëse partitë opozitare do të propozonin një emër të përbashkët.
“Në momentin që opozita del me një kandidat të përbashkët, kjo do të ishte gjëja e parë që do ta bëja sepse është shumë e rëndësishme që Kosova ta ketë presidnetin sesa emri i tij të jetë Glauk Konjufca”, tha ai.
Ndërkaq, kryeministri i Kosovës, Albin Kurti, tha shkurt për mediat se është në kontakt me krerët e partive opozitare, dhe “kur ka rezultate atëherë ju njoftojmë”./teve1.info/
