Profesori universitar Nexhmedin Spahiu paralajmëron se Kosova mund të përballet me një tjetër periudhë të paqëndrueshme politike pas zgjedhjeve të 28 dhjetorit, duke theksuar se rezultatet e pritshme nuk do të sjellin ndryshime të mëdha në raportin e forcave politike.
Spahiu u shpreh se zgjedhjet lokale të mbajtura së fundi kanë treguar një pasqyrë të ngjashme me ato parlamentare të shkurtit, gjë që sipas tij, e bën të vështirë të pritet një rikonfigurim i madh politik.
“Pres që kriza të thellohet edhe më shumë, për shkak se rezultatet kanë treguar që nuk ka shumë ndryshime nga zgjedhjet në nivel kombëtar. Pas gjithë atyre katrahurave të këtij viti, mendoj që plus-minus ndonjëra parti mund të fitojë më shumë deputetë e tjetra më pak, por jo aq sa të ndryshojë renditjen”, tha ai në emisionin “Info Nata” në Tëvë1.
Profesori vlerëson se Vetëvendosja mbetet favorite për të dalë e para, por pa shumicë të mjaftueshme për të siguruar stabilitet institucional.
“VV-ja do të jetë e para, por është herët të flitet saktë – mund të ketë 3-4 deputetë më shumë ose më pak. Edhe nëse i fiton 41 deputetë, me këtë logjikë prapë kemi me shkuar në zgjedhje, sidomos kur vjen puna te presidenti”, theksoi Spahiu, duke paralajmëruar telashe të reja në fazën e paszgjedhjeve. /teve1.info/
