Analisti politik Nexhmedin Spahiu në emisionin “Info Nata” në Tëvë1, ka komentuar ngërçin institucional që po përjeton vendi, duke theksuar rolin që mund të ketë Gjykata Kushtetuese në ndihmën për të dalë nga kjo situatë.
Sipas Spahiut, Gjykata Kushtetuese nuk ka kompetencë të ndryshojë Kushtetutën, por mund ta interpretojë atë, duke ofruar një rrugë procedurale që do të ishte në përputhje me normat kushtetuese.
“Gjykata Kushtetuese, duke parë realitetin dhe situatën politike, mund të japë një efekt real për zhbllokim institucional. Ajo nuk mund të ndryshojë Kushtetutën, por mund të japë një interpretim që udhëzon partitë për të propozuar kandidat e për të proceduar me votim,” u shpreh Spahiu.
Ai vlerësoi se ideja që vetëm një kandidat të jetë në garë, duke i kushtëzuar partitë për ta votuar, është në kundërshtim me Kushtetutën, e cila kërkon përfaqësim të tre grupeve më të mëdha parlamentare në udhëheqjen e Kuvendit përkatësisht në pozitat e kryetarit dhe dy nënkryetarëve, përfshirë një përfaqësues nga komunitetet jo-shumicë.
“Nuk ka arsye pse të mos zgjidhet një deputet që ka shumicën e votës. Përpjekjet për ta kufizuar garën vetëm me një emër janë të gabuara dhe përjashtuese,” shtoi ai.
Spahiu nënvizoi se respektimi i frymës së Kushtetutës do të ndihmonte në shmangien e bllokadave politike dhe do t’i jepte institucioneve legjitimitetin e munguar.
