Profesori universitar, Nexhmedin Spahiu, ka thënë se betimi i kryetarit të Mitrovicës së Veriut nga Lëvizja Vetëvendosje, Erden Atiq, duhet të bëhet pavarësisht sfidave dhe rreziqeve që mund të ekzistojnë.
Spahiu, beson që nuk do të ketë rrezik të madh për tu bërë betimi dhe për tu kryer me sukses procesi.
“Betimi i kryetarit të Mitrovicës së Veriut duhet të bëhet pavarësisht sfidave dhe rreziqeve që mund të ekzistojnë në një rast të tillë. Nuk besoj që do të ketë ndonjë rrezik të madh për tu bërë betimi dhe për tu kryer procesi me sukses. Natyrisht e kam drojën që asamblistët të frikësohen, kryetari besoj që nuk është një njeri që frikësohet. Besoj që do të kaloj ashtu siç duhet”, tha ai në emisionin “Info Nata” në Tëvë1.
Sipas profesorit, ajo çfarë është detyrë e informacionit politik në Mitrovicën e Veriut, është që për herë të parë të ngritët flamuri i Kosovës.
“Ajo çfarë do të duhej dhe që është detyrë e këtij informacioni politik është që për herë të parë një institucional në veri të Kosovës ta ngrisin flamurin e Kosovës. Kjo natyrisht përbën sfidën, sepse do të ishte absurde që të bëhej betimi në lojalitet ndaj shtetit të Kosovës dhe aty të mos ishin simbolet e Kosovës. Kjo duhet të bëhet në sallën ku bëhet betimi dhe në objektin e Komunës, të cilën e ka ndërtuar Bashkimi Evropian para disa viteve”, shtoi ai. /teve1.info/
