Spahija në Ditën Botërore kundër duhanit, theksoi se përveç masave vetëdijesuese për parandalimin e pirjes së duhanit, një masë efikase sipas tij, e kanë edhe masat ndëshkuese.
“Masat vetëdijesuese në kuptimin e njoftimit të popullatës me pasojat e duhanit normalisht që duhet të bëhen duke filluar nga shkollat, mirëpo një masë shumë efikase e vetëdijësimit të qytetarëve dhe atyre që e shkelin ligjin dhe që dëmtojnë shëndetin e të tjerëve duke konsumuar duhan duke i detyruar t’i ekspozohen tymit të duhanit është e domosdoshme. Pra masat ndëshkuese janë masë shumë efikase e vetëdijësimit të qytetarëve për respektimin në këtë rast të ligjit, por i cili pastaj prodhon efekt shëndetësor”, tha ai.
Spahija në emisionin “Ditari” theksoi se në Kosovë është pothuajse normale pirja e duhanit në ambiente të mbyllura.
“Një rrezik tjetër i moszbatimit të ligjit është krijimi i një dukurie normale të duhanpirjes. Sot në Kosovë të konsumosh duhan në ambient të mbyllur është pothuajse normale, bëhet haptasi dhe bëhet çdo kund, dhe kjo ka mbetur në vullnetin e atyre që menaxhojnë këto hapësira se a dëshirojnë ata të lejojnë apo jo një gjë të tillë”, tha ai.
Kurse shtoi se qëllimi i hartimit të ligjit kundër pirjes së duhanit në ambiente të mbyllura, atëherë kur është bërë, është bërë në bazë të shumë dëshmive të mbledhura nga institucione shumë të respektuara dhe siç tha ai, ka për qëllim jo vetëm mbrojtjen e shëndetit të atyre që nuk e konsumojnë duhanin por edhe të atyre që konsumojnë duhanin. /teve1.info/
