Profesori universitar, Nexhmedin Spahiu ka thënë se kryeministri në detyrë Albin Kurti i cili ka fituar në zgjedhjet e 28 dhjetorit me mbi 50% të votave do të bënte gabim nëse e dërgon vendin në zgjedhje për shkak të zgjedhjes së presidentit.
Ai deklaratën e Kurtit i cili tha se ka gjasa reale që vendi të shkojë në zgjedhje në vitin 2026, nëse nuk zgjidhet presidenti, ka thënë se kjo është një përpjekje për t’i kërcënuar partitë tjera.
“Përpiqet me i kërcënuar partitë tjera më këtë rezultat, por një njeri me mend në kry nuk i hin atij rreziku duke i pasur 51% të votave të fituara. Kur i ke punët mirë me lyp edhe më mirë të vret Zoti. Nuk është një punë me mend nëse do ta bënte këtë, thjeshtë do duhej ta gjej një personalitet i cili do të marrë votat e opozitës tek e fundit kur t’i kesh 51% për ty nuk është e rëndësishme kush është president”, ka thënë ai në emisionin “InfoNata” në Tëvë1.
Ndërsa, analisti politik Artan Alijaj ka thënë se zgjedhja e presidentit është në dorë të opozitës.
Sipas tij, pavarësisht rezultatit “historik” të LVV-së, zgjedhja e të partit të shtetit nuk mund të bëhet pa qëndrimin në sallën e Kuvendit të partive opozitare.
“Ajo që është fakt është se zgjedhja e presidentit është në duart e opozitës, është rezultat historik i LVV por pa një bashkëpunim me opozitën nuk mund t’i arrijë 2/3 në Kuvend. Është mundësi që mund të ndodhë, nuk kemi dëgjuar asgjë nga opozita për fat të keq. Është fakt që mund të shkohet në zgjedhje përsëri në prill”, ka thënë ai në emisionin “InfoNata” në Tëvë1.
Sipas tij, Vjosa Osmani e meriton të jetë presidente edhe për një mandat.
“Mendoj që nuk kemi nevojë për eksperimentet të tjera, e kemi një presidente që është treguar e suksesshme në arenën ndërkombëtare dhe është më se valide që znj. presidente e ka konfirmuar rikandidimin e saj”, është shprehur Alijaj.
Por, sipas Spahiut, Vjosa Osmani nuk e meriton edhe një mandat. Ai vlerëson se përformanca e presidentes ka qenë e dobët.
