Nuk ka shkarkim por as dorëheqje, trajneri Gareth Southgate do të vijojë të qëndrojë në krye të kombëtares së Anglisë.
Tekniku anglez ishte në dyshim pas eliminimit në çerekfinalen e Kupës së Botës ndaj Francës, teksa Tre Luanët këkronin me ngulm triumfin në Katar.
Gjithsesi, vetë Southgate dhe drejtuesit e Federatës kanë gjetur gjuhën e përbashkët dhe siç shkruhet në një njoftim nga Federata, 52-vjeçar do të vijojë punën me fokusin tek Europiani i vitit 2024.
“Jemi shumë të lumtur të njoftojmë se Gareth Southgate do të vijojë punën në krye të kombëtares dhe është udhëheqësi ynë për fushatën eliminatore të Euro 2024. Gareth, por edhe Steve Holland kishin gjithnjë mbështetjen tonë dhe tashmë ne nisim punën për Europian”, thuhet në njoftimin e FA.
Southgate është në krye të britanikëve prej vitit 2016, teksa arritja, por edhe pengu i tij më i madh mbetet disfata në finalen e Euro 2020 ndaj Italisë nga penalltitë, derisa ndeshja e rregullt kishte përfunduar 1:1.
