Nis të shtunën me një ndeshje dhe përmbyllet të hënën me dy duele, java e 30 –të e Superligës në futboll, me përballje interesante, kur gara po bëhet më e nxehtë.
Malisheva – Llapi, dueli që ka zgjuar gjithnjë rivalitet të madh, por edhe rezultate befasuese, është ndeshja që e hap xhiron 30, të shtunën, duke nisur nga ora 15:00 në stadiumin “Liman Gegaj” në Malishevë.
Malisheva vjen nga humbja në mesjavë me Ferizajn, derisa Llapi është në seri prej dy fitoreve rresht dhe duke ikur nga pozita e parafundit.
Skuadra e Batatinës, ka një seri pozitive të rezultateve me vetëm një humbje nga pesë të fundit. Malisheva që e ka blinduar pozitën e tretë, nga tri ndeshjet e këtij sezoni kundër Llapi i ka dy fitore derisa ndeshja e fundit ndërmjet dy ekipeve ka përfunduar pa fitues.
