Nga sot e deri më 2 qershor, Kosova do të jetë nikoqire e ushtrimit më të madh ndërkombëtar “Defender Europe ‘23”.
Nga ora 11:30 nisë ceremonia zyrtare në sheshin “Skënderbeu” në Prishtinë.
Në këtë ceremoni e pranishme do të jetë presidentja e Kosovës, Vjosa Osmani, kryeministri Albin Kurti, ministri i Mbrojtjes, Armend Mehaj dhe komandanti i FSK-së, Bashkim Jashari.
Ky ushtrim udhëhiqet nga ushtria amerikane dhe synim ka rritjen e bashkëpunimit në mes të partnerëve si dhe gatishmërinë operacionale të NATO-s dhe partnerëve për të reaguar në rast kërcënimi ndaj Evropës.
Derisa, presidentja e Kosovës, Vjosa Osmani, javë më parë ka shprehur mbështetjen e plotë për zhvillimin dhe avancimin e FSK-së, si dhe mbarëvajtjen e Stërvitjes.
Ndërkohë, koloneli i Forcës së Sigurisë së Kosovës, Ejup Maqedonci, ditë më parë ka thënë se mbi 1300 trupa të kësaj force do të marrin pjesë në ushtrimin “Defender Europa ‘23”.
Maqedonci në emisionin “Ditari” në Teve1 ka thënë se ky është ushtrimi më i madh i mbajtur ndonjëherë, sidomos sa i përket përfshirjes së Kosovës.
“Është ushtrim më i madh, sidomos sa i përket pjesës së Kosovës. Ne herën e parë kemi marrë pjesë me 330 trupa, kësaj radhe do të jemi me mbi 1300 trupa, duke mos e përfshirë pjesën administrative, shtabore, mbështetjen që e bënë Ministria dhe mbështetjen që bëjnë shtabet në kuadër të FSK-së”, ka deklaruar ai.
Ai po ashtu, ka thënë se në këtë ushtrim do të marrin pjesë ushtri të 25 vende, ndërsa në Kosovë do të zbarkojnë pesë të tilla. /teve1.info/
