Liga e Kampionëve rikthehet sonte me dy ndeshje të tjera, mjaft interesante, pasi luhet për gjithçka.
Në “Estadio de Dragao” Porto është nikoqir i Interit. Ndeshja e parë në Itali kishte përfunduar në të mirë të skuadrës së Inzagit, me rezultatin 1-0, ndeshje e cila u vendos me golin e vetëm të Romelu Lukakut.
Porto në këtë ndeshje nuk mund të llogarisë në Otavion, i cili u ndëshkua me karton të kuq në ndeshjen e parë, ndërsa nuk bëhet fjalë për lëndime.
Në anën tjetër, tek Interi mungojnë Dalbert dhe Correa, të cilët nuk do të jenë të gatshëm për një kohë të gjatë, ndërsa pjesa tjetër e skuadrës janë nën dispozicionin e trajnerit dhe varet nga ai se me kë do të startojë.
Ndeshja tjetër zhvillohet në “Etihad Stadium”, me Manchester Cityn që e pret skuadrën e Leipzig. Dueli i parë në “Red Bull Arena” kishte përfunduar me rezultat të barabartë 1-1 dhe çdo gjë është e hapur sonte.
Tek vendësit janë të gjithë futbollistët të gatshëm, ndërsa gjermanët nuk mund të llogarisin në futbollistë si Schlager, nkunku, Gulasci, Diallo e Schlieck.
Të dyja ndeshjet zhvillohen me fillim nga ora 21:00.
