Me ndeshjen Llapi – Drita, do të mbyllet xhiroja e tretë e Superligës së Kosovës, që nisi të dielën.
Dueli mes këtyre dy skuadrave, do të zhvillohet në stadiumin “Zahir Pajaziti” në Podujevë prej orës 16:30.
Si Llapi ashtu edhe Drita, janë në kërkim të fitores së parë kampionale në sezonin 2025/26, ndonëse kampionia e Kosovës ka një ndeshje më pak të luajtur se skuadra nga Podujeva.
Drita, e ka luajtur vetëm një ndeshje deri më tani dhe atë në kuadër të xhiros së parë kur pësoi 1:0 nga Ferizaj.
Në anën tjetër, Llapi ka një barazim dhe një humbje, ndërsa nuk e ka shënuar asnjë gol në sezonin e ri.
Te skuadra e Llapit ndaj Dritës, pritet të debutojë sulmuesi Muhamet Hyseni, të cilin ekipi i Tahir Batatinës e ka huazuar deri në fund të sezonit nga AC Horsens.
Ndërkohë, rezultatet e ndeshjeve të luajtura të Superligës, janë: Gjilani – Prishtina 3:1, Drenica – Prishtina e Re 1:0, Malisheva – Dukagjini 0:1 dhe Ferizaj – Ballkani 1:3.
