Sot në Prishtinë pritet të mbahet seanca e shqyrtimit gjyqësor ndaj Naim Murselit, Granit Plavës dhe Kushtrim Kokallës, të cilët po përballen me drejtësinë nën dyshimet për përfshirje në vrasjen e Liridona Ademajt.
Seanca do të zhvillohet në ambientet e Pallatit të Drejtësisë.
Të tre të pandehurit akuzohen për role të ndryshme në këtë rast penal.
Dy të akuzuarit kryesor më herët kanë pretenduar se vuajnë nga çrregullime mendore, mirëpo pas ekzaminimeve përkatëse, Instituti i Psikiatrisë Forenzike ka konstatuar se asnjëri prej tyre nuk ka pasur probleme të shëndetit mendor në kohën kur dyshohet se është kryer vepra penale.
Gjatë seancës fillestare të mbajtur më 31 janar 2025, Naim Murseli është deklaruar i pafajshëm për vrasjen e bashkëshortes së tij. Ndërkohë, Granit Plava nuk ka dhënë deklaratë lidhur me fajësinë, ndërsa Kushtrim Kokalla ka refuzuar të deklarohet pa u konsultuar më parë me avokatin mbrojtës.
Në zhvillime të tjera lidhur me këtë rast, Gjykata e Apelit ka ndryshuar vendimin e shkallës së parë për Tom Dodajn, i akuzuar për shitjen e armës që dyshohet se është përdorur në vrasje. Apeli e ka shpallur Dodajn fajtor dhe e ka dënuar me tre vjet burgim si dhe me gjobë prej 3 mijë eurosh. /teve1.info/
