Ministria e Kulturës, Rinisë dhe Sportit njofton se sot ( e diel) organizohet mbledhje komemorative për shkrimtarin Rushit Ramabaja.
Homazhet fillojnë nga ora 11:00, kurse mbledhja komemorative mbahet në ora 12:00, në Amfiteatrit e Teatrit Kombëtar të Kosovës.
Kurse ceremonia e varrimit bëhet në ora 13:00, në varrezat familjare në fshatin Shkabaj të Prishtinës.
Ndryshe shkrimtari, Rushit Ramabaja sot ka ndërruar jetë në moshën 77 vjeçare. Ishte një nga figurat e shquara të letërsisë dhe mendimit shqiptar. Lajmi për vdekjen e tij është bërë i ditur nga familjarë dhe miq përmes rrjeteve sociale.
Ramabaja ishte gazetar kulture në gazetën Rilindja, shkrimtar, romansier e poet, si dhe i burgosur politik dhe mbështetës i lëvizjeve çlirimtare. I njohur për fjalën e urtë dhe angazhimin intelektual, ai la pas një trashëgimi të çmuar letrare dhe shpirtërore.
Ikja e tij paraqet një humbje të rëndë jo vetëm për familjen dhe miqtë, por për gjithë kulturën dhe mendimin shqiptar. Me veprën, fjalën dhe qëndrimin e tij, Rushit Ramabaja la gjurmë të pashlyeshme në letërsinë shqipe dhe në ndërgjegjen kolektive të kombit.
Ai ishte model i intelektualit të angazhuar, shembull dinjiteti njerëzor dhe udhërrëfyes shpirtëror, duke mëkëmbur përgjegjësinë e fjalës së shkruar, guximin në mendim dhe dashurinë e përditshme për Atdheun.
