Një marshim në Tiranë është paralajmëruar për sot për të kërkuar drejtësi për vrasjen e Liridona Ademaj-Murselin.
Marshimi, sipas njoftimit, do të nisë në orën 11:30 nga Ministria e Brendshme drejt Ambasadës së Kosovës në Tiranë.
Ndryshe, Liridona Murseli, 30-vjeçare, është vrarë të mërkurën, më 29 nëntor, në rrugën “Dalip Alshiqi” në Prishtinë.
Ndërsa, sot po ashtu në Gjykatën Themelore në Prishtinë, duke filluar nga ora 09:30, mbahet seanca gjyqësore ndaj bashkëshortit të Liridona Ademajt, Naim Murseli si organizator i vrasjes, dorasit Granit Plavës dhe Kushtrim Kokalla, pjesëtar i FSK-së.
Pas përfundimit të seancës, gjykatësi i procedurës paraprake pritet të caktojë nga një muaj paraburgim për të dyshuarit.
