Mbrëmjen e kësaj të marte, do të luhen dy ndeshjet e kthimit në fazën çerekfinale të Ligës së Kampioneve.
Borussia Dortmund pret Barcelonën në “Signal Iduna Park”, ndërsa Parisi udhëton drejt Anglisë për t’u përballur me Aston Vilën.
Gjermanët përballen me një mision thuajse të pamundur. Pas humbjes 4-0 në ndeshjen e parë në Spanjë, të gjitha statistikat dhe parashikimet janë kundër tyre.
Nga ana tjetër, Barcelona është në një moment fantastik. Pas fitores 1-0 në udhëtim ndaj Leganés në La Liga, katalanasit vazhdojnë garën në tre fronte.
Ata nuk kanë qenë në gjysmëfinale të Ligës së Kampionëve që nga sezoni 2018/2019, por tani janë me një këmbë në këtë fazë.
Me një rekord të jashtëzakonshëm prej 24 ndeshjesh pa humbje në vitin 2025, me 20 fitore dhe 4 barazime, përfshirë 8 fitore radhazi jashtë fushe, Barça duket e vendosur për të vulosur kualifikimin.
Në ndeshjen tjetër çerekfinale, Aston Villa ka një mal për të ngjitur pas humbjes 3-1 në Francë ndaj PSG-së.
Aston Villa ka një rekord mjaft pozitiv në shtëpi ndaj skuadrave franceze me 3 fitore dhe 1 humbje, ndërsa kanë fituar 10 nga 12 ndeshjet e fundit europiane në “Villa Park”.
Në krahun tjetër, PSG-ja ka treguar përmirësim në ndeshjet si mysafire, veçanërisht me fitoren ndaj Liverpool në raundin e 1/16-ave që ndërpreu një seri prej katër humbjesh në tokën angleze.
