Dita Ndërkombëtare e Aviacionit Civil u krijua fillimisht në vitin 1994, në kuadër të aktiviteteve të 50-vjetorit të Organizatës Ndërkombëtare të Aviacionit ( ICAO).
Dy vite më vonë, në 1996, Asambleja e Përgjithshme e Kombeve të Bashkuara e njohu zyrtarisht 7 dhjetorin si datë të përvitshme të këtij përkujtimi ndërkombëtar.
Dita Ndërkombëtare e Aviacionit Civil shënohet në mbarë botën, me qëllimin për të rritur ndërgjegjësimin mbi rëndësinë e aviacionit civil për zhvillimin shoqëror dhe ekonomik të shteteve.
Përmes kësaj dite, nënvizohet edhe roli unik i Organizatës Ndërkombëtare të Aviacionit Civil (ICAO) në nxitjen e bashkëpunimit mes vendeve dhe garantimin e një tranziti global të sigurt, të shpejtë dhe në shërbim të njerëzimit.
Sipas OKB-së, rëndësia e aviacionit civil është theksuar edhe më shumë me miratimin e Agjendës 2030 për Zhvillim të Qëndrueshëm, ku fluturimet ndërkombëtare konsiderohen një shtyllë qenësore për lidhjen globale, për nxitjen e paqes dhe rritjen e prosperitetit ekonomik.
Objektivat e Konventës së Çikagos vazhdojnë të shërbejnë si orientim kryesor për zhvillimin e qëndrueshëm dhe të sigurt të aviacionit botëror.
Tradicionalisht, çdo pesë vjet në përvjetorët e ICAO-s si 2014, 2019, 2024 dhe 2029 – Këshilli i organizatës përcakton një temë të veçantë jubilare për këtë ditë.
Gjatë viteve ndërmjet përvjetorëve, Këshilli zgjedh një temë unifikuese që mbulon të gjithë periudhën katërvjeçare, me synimin për të reflektuar prioritetet e sektorit dhe sfidat e tij globale.
