Peter Sorensen do të vazhdojë të ushtrojë detyrën e emisarit të Bashkimit Evropian për dialogun ndërmjet Kosovës dhe Serbisë edhe për një mandat dyvjeçar.
Vendimi për zgjatjen e mandatit të tij u miratua të mërkurën nga Këshilli Evropian.
Sorensen e ka marrë këtë rol në janar të vitit të kaluar, duke udhëhequr përpjekjet e BE-së në procesin e dialogut mes dy vendeve.
Gjatë vitit të parë të mandatit të tij si i dërguar i posaçëm për dialogun, nuk është zhvilluar asnjë takim në nivel udhëheqësish.
Edhe takimet e mbajtura ndërmjet kryenegociatorëve nuk kanë sjellë rezultate konkrete apo lëvizje përpara në proces.
Këto takime janë karakterizuar kryesisht nga qëndrime të kundërta dhe akuza reciproke mes palëve, ndërsa Bashkimi Evropian ka theksuar vazhdimisht zhgënjimin për mungesën e gatishmërisë për të zbatuar obligimet e marra në kuadër të dialogut.
