Emisari i posaçëm i Bashkimit Evropian për dialogun Kosovë–Serbi, Peter Sorensen, është pritur të martën në takim nga kryeministri në detyrë i Kosovës, Albin Kurti, në objektin e Qeverisë në Prishtinë.
Ky takim vjen pas atij që Sorensen zhvilloi më herët gjatë ditës me presidenten Vjosa Osmani.
Vizita e Sorensenit në Prishtinë lidhet me përgatitjet për vazhdimin e dialogut ndërmjet Kosovës dhe Serbisë, të ndërmjetësuar nga Bashkimi Evropian. Raundi i fundit i këtij dialogu ishte mbajtur më 10 qershor, në nivel të kryenegociatorëve. Pas këtij takimi, Sorensen kishte deklaruar se po punohej për organizimin e një takimi të nivelit të lartë mes liderëve.
Që nga shtatori i vitit 2023, Kosova dhe Serbia nuk kanë zhvilluar një takim të tillë. Takimi i fundit i nivelit të lartë kishte ndodhur disa ditë përpara sulmit të armatosur në Banjskë të Zveçanit, ku një grup serbësh të udhëhequr nga Milan Radoiçiq sulmuan Policinë e Kosovës, duke lënë të vrarë rreshterin Afrim Bunjaku.
