Juristi, Shkelzen Sopjani ka deklaruar se nuk beson që kryeministri në detyrë dhe kryetari i Lëvizjes Vetëvendosje, Albin Kurti, është i gatshëm t’ia ofrojë Lidhjes Demokratike të Kosovës postin e presidentit, në kuadër të një marrëveshjeje të mundshme për formimin e institucioneve.
Duke folur për afatin e mbetur për krijimin e institucioneve, mundësitë e bashkëpunimit të LVV-së me partitë e tjera dhe takimet e zhvilluara të premten me PDK-në dhe LDK-në, Sopjani ka thënë se beson se Kurti do të ishte më i gatshëm t’i ofronte LDK-së pozita në ekzekutiv, përfshirë drejtimin e Qeverisë.
“Nuk besoj që Albin Kurti është i gatshëm t’ia japë pozitën e presidentit LDK-së. Besoj se është më i gatshëm t’i japë pozita të tjera, me theks të veçantë Qeverinë, sepse aty e ka më të lehtë ta mbajë nën kontroll partnerin e koalicionit dhe, nëse është e nevojshme, ta prishë koalicionin pa e rrezikuar Qeverinë, pasi i ka numrat”, është shprehur Sopjani.
Ai ka shtuar se, me përbërjen aktuale parlamentare, nuk pret që Kurti të hyjë në një marrëveshje që do t’ia jepte LDK-së postin e presidentit.
“Sa i përket presidentit, nuk besoj se me këta numra ai është i gatshëm të hyjë në një marrëveshje të tillë, duke pasur parasysh se presidenti është shumë i vështirë të largohet nga detyra dhe mund të ndikojë në politikëbërjen e përditshme për shkak të rolit dhe kompetencave që ka”, ka përfunduar ai./teve1.info/
