Nga dita e sotme ka hyrë zyrtarisht në fuqi periudha e fushatës për zgjedhjet e jashtëzakonshme parlamentare në Kosovë, e cila do të zgjasë deri në orët e para të 7 qershorit.
Për këtë, juristi Shkelzen Sopjani ka kritikuar gjuhën që po përdoret nga partitë politike gjatë fushatës zgjedhore, duke vlerësuar se mesazhet që po përcillen nuk janë në dobi të qytetarëve dhe votuesve.
Ai tha se subjektet politike kanë qenë shumë aktive me aktivitete dhe debate televizive, por sipas tij, përmbajtja e komunikimit publik ka qenë shqetësuese.
“Të gjitha partitë kanë qenë aktive, kanë promovuar aktivitete, kanë qenë çdo natë gati në debate televizive pjesëtar ose akter të ndryshëm të partive politike, përkundër që kanë qenë shumë aktive, nuk kanë qenë shumë dobiprurëse në mesazhe që do duhej t’i jepnin popullit, pastaj edhe votuesve të vet. Gjuhën që janë duke e përdorur ende të paktën nuk do duhej të përdorin në fushatë sepse këta janë në një far forme duke prodhuar dhunë, bullizëm. Në secilën fushatë po shohim një përshkallëzim të kësaj dhune dhe në asnjë moment degradim të tonëve”, ka deklaruar Sopjani.
Sipas tij, fushata politike po ndikon negativisht në klimën zgjedhore dhe po nxit tensione të panevojshme në shoqëri.
Ndryshe, Sopjani ka folur lidhur me ndarjen e 2 milionë eurove për linjat e fluturimit për mërgatën, duke vlerësuar se rasti duhet të hetohet nga organet kompetente.
Ai tha se ekzistojnë elemente që, sipas tij, mund të nxisin nisjen e një hetimi për mënyrën dhe arsyen e ndarjes së këtyre mjeteve.
“Ka elemente me e inicua nje hetim këtë rast është qështje e prokurorisë, me e pa pse është bërë kjo dhe kur realisht po shkojnë ato para, sa i përket këtyre të tjerave asnjë prej këtyre shtesave s’janë duke me u dokt të arsyeshme në asnjë rrethanë s’janë duke ua lehtësuar jetën qytetarit përkundrazi po privojnë qytetarin nga fondet me të cilat mund të kryhen disa projekte me të cilat janë të rëndësishme në përfitim shumë më afatgjate shumë ma përfitimprurëse”, ka deklaruar Sopjani.
Sipas tij, fondet publike duhet të orientohen në projekte që sjellin përfitime afatgjata për qytetarët dhe jo në vendime që, siç tha ai, nuk kanë ndikim të drejtpërdrejtë në përmirësimin e jetës së tyre./teve1.info/
