Pas shtatë netëve magjike që përjetuam së bashku në PRIZREN FEST me shfaqje teatrale nga Italia, Franca, Palestina, Maqedonia e Veriut, Anglia, Greqia, Bullgaria, Turqia, Shqipëria dhe Kosova, me punëtori, konferenca/panele diskutimi si dhe ndeja të paharruara, ju ftojmë që së bashku të përmbyllim këtë rrugëtim të Edicionit IV të PRIZREN FEST të nisur më datë 21 korrik 2025.
Ndërkaq mbrëmja e 27 korrikut solli në skenat e qytetit tre shfaqje teatrale të fuqishme dhe të shumëllojshme nga Bullgaria dhe Maqedonia e Veriut, që sfiduan emocionet, normat dhe ndërgjegjen sociale të publikut.
“Drunks” nga Teatri Dramatik dhe i Kukullave “Konstantin Velichkov” (Bullgari), i vendosur në Teatrin “Bekim Fehmiu”, solli një reflektim tragjikomik për shpirtin e njeriut në gjendje ekstreme. Me 14 personazhe të dehur nga fillimi në fund, shfaqja zbuloi të vërteta intime që në realitet shpesh mbeten të heshtura.
“8%”, një produksion i ATO Center nga Maqedonia e Veriut, u shfaq në Autostrada Bienale Hangar II. E realizuar në formatin “verbatim”, shfaqja ngriti zërin kundër diskriminimit dhe korrupsionit përmes dëshmive reale të njerëzve të margjinalizuar, një protestë artistike me zë të fuqishëm dhe autentik.
Ndërsa për më të vegjlit “THREE”, shfaqja e parë profesionale për fëmijë në gjuhën e shenjave në rajon, u mbajt në “Teatrin mbi Lum”. E ndërthurur mes gjuhës së folur dhe gjuhës së shenjave, kjo performancë ndërgjegjësoi mbi mbrojtjen e mjedisit, ndërsa i edukoi fëmijët për përfshirjen dhe komunikimin pa barriera.
