Në shtëpinë e tij nuk mund të bëjë asnjë ndryshim.
Basri Krasniqi, i cili banon në lagjen Kalabri në kryeqytet, nuk mund të shtojë ndonjë kat e as të ndërtojë shtëpi të re në këtë lagje.
Ani pse ai thotë se nevojat janë, pas zgjerimit të familjes.
Kjo për shkak se tash e dy vite, plani urbanistik i kësaj lagje është bllokuar në kuvendin komunal në Prishtinë.
Në mungesë të këtij plani, në këtë lagje nuk mund të bëhet asnjë ndërtim.
“Familjet janë rritë, nuk kemi mundësi me zhvillu vetë, por problemi është se për me ju bo zgjidhje familje ky plan duhet me ju aprovu në komunë të Prishtinës, realisht e gjithë lagjja zhvillohet se edhe ne jemi tatim pagues si krejt të tjerët. As nuk jepni leje për ndërtimin e shtëpisë as nuk mundem me zhvillu shtëpitë, as nuk mundem mu zgjeru si familje me ndërtuar ndonjë kat ose ndonjë shtëpi se nuk jepni leje”, tha Krasniqi.
E ky plan urbanistik, ishte paraparë që më datë 24 maj të diskutohej në kuvendin e kryeqytetit.
Por si duket as me këtë datë nuk pritet që të votohet ky plan.
“Po realisht është tu luajt një lojë ping-pong, kryetari Përparim Rama, po thotë që faji është te kryesuesi i Kuvendit, Fehmi Kupina, Fehmi Kupina po thotë që është faji te Përparim Rama. Ne si banorë nuk e dimë të kush është faji, ne kemi marr premtim publik në seancë e fundit që plani do të dal me 24 maj. Sipas të gjitha informatave me 24 nuk do të del”, tha Krasniqi.