Profesori universitar, Avdi Smajljaj ka thënë se marrëveshja e arritur në Bruksel ndërmjet dy kryenegociatorëve të Kosovës dhe Serbisë duhet të jetë tema kryesore e zbatimit në dialog.
Ai ka thënë se uron që marrëveshje e sotme të jetë një epilog për zbardhjen e të pagjeturve.
Smajljaj ka thënë se për zvarritjen e këtij procesi fajtor është dhe komuniteti ndërkombëtar, që siç ka thënë ai nuk ka bërë presion sa duhet ndaj Serbisë.
“Që në fillimin e mandatit i përfaqësuesit të BE-së për negociata, z.Sorensen një prej objektivave ka qenë çështja e të pagjeturve, e cila vazhdon të jetë një ndër çështjet më të ndjeshme, sidomos për Kosovën dhe uroj që kjo marrëveshje të jetë një epilog i zbardhjes së fatit të pagjeturve. Është një çështje që mund ta fajësojmë edhe komunitetin ndërkombëtar që nuk i ka bërë presion sa duhet Serbisë që të hap arkivat dhe të bashkëpunojë për zbardhjen e fatit të pagjeturve. Në procesin e zhvillimit të dialogut kjo do duhej të jetë tema e parë, por mendoj se edhe ne jemi vonuar dhe nuk i është dhënë prioritet i mjaftueshëm që kjo çështje të zbardhet para çdo pike në dialogun mes Kosovës dhe Serbisë”, tha ai në emisionin “InfoNata” në Tëvë1.
Kosova dhe Serbia janë pajtuar që të funksionalizojnë Komisionin për Personat e Pagjetur gjatë luftës në Kosovë.
Këtë e ka konfirmuar kryenegociatori i Kosovës, Besnik Bislimi.
“Pjesa më e madhe e kohës sot ka kaluar në takime bilaterale, domethënë fillimisht pala kosovare me Bashkimin Evropian dhe pastaj edhe pala serbe. Qëllimi ishte që të arrijmë dakordim që sot ta funksionalizojmë Komisionin e Përbashkët për jetësimin apo zbatimin e marrëveshjes për personat e pagjetur në mes të Kryeministrit Kurti dhe presidentit Vuçiq. Takimet ishin të suksesshme dhe në fund arritëm që përfundimisht ta jetësojmë këtë objektiv. Tani ka mbetur që në javët e ardhshme të takohen zëvendësat tanë dhe të përcaktojnë prioritetet e para për punën e Komisionit të Përbashkët”, tha Bislimi pas takimit.
