Politologu, Avdi Smajljaj ka vlerësuar se votat e Partisë Demokratike të Kosovës (PDK) do të jenë përcaktuese për zgjedhjen e fituesit në garën e balotazhit për kryetar të Prishtinës.
Sipas Smajljajt, PDK-ja ka gjasa t’i japë një mbështetje të heshtur kandidatit të Lidhjes Demokratike të Kosovës (LDK), Përparim Ramës.
“Gara ende nuk ka përfunduar. Mendoj se votat e PDK-së do të jenë përcaktuese për të vendosur se kush do të fitojë. Nuk besoj se do të ketë ndonjë koalicion formal paraprak, por një mbështetje në heshtje ndaj Ramës është e mundur, dhe kjo mund t’i japë atij një shans për të fituar. Gara mbetet e papërfunduar dhe është shumë e ngushtë. Megjithatë, votat e PDK-së ka më shumë gjasa të shkojnë drejt LDK-së sesa drejt VV-së. Ashtu si në zgjedhjet e kaluara, edhe tani ka shumë mundësi që ato vota t’i shkojnë Përparim Ramës dhe t’ia sigurojnë fitoren. Votat e PDK-së janë faktor përcaktues për fituesin në Prishtinë”, ka thënë Smajljaj në emisionin “Këndi i Debatit” në Tëvë1.
Ai ka shtuar se kandidati i Vetëvendosjes, Hajrulla Çeku ka llogaritur shumë në “frymën” e VV-së, një frymë e cila sipas tij, në vitin 2025 nuk është më e njëjtë si në vitin 2021.
“Kandidati i VV-së ka llogaritur shumë në votën e frymës së VV-së, e cila në 2025 nuk është si në 2021. Ai ka llogaritur edhe në strukturën e degëve dhe nëndegëve të VV-së, ku edhe aty shihet një rënie e lehtë krahasuar me votat në të kaluarën”, ka theksuar ai.
