Politologu, Avdi Smajljaj ka vlerësuar se partitë politike në vend janë më të interesuara të shkojnë në zgjedhje të reja sesa të gjejnë një zgjidhje për ngërçin rreth çështjes së presidentit.
Në emisionin “Info Nata” në Tëvë1, ai është shprehur se takimet e kryeministrit, Albin Kurti me liderët e partive opozitare po zhvillohen më shumë për efekt publik sesa për rezultate konkrete.
Sipas Smajljajt, afati i shkurtër i mbetur po përdoret nga partitë për të menaxhuar perceptimin e opinionit publik.
“Ky afat i pakët po shërben më shumë për të ushtruar presion tek partitë që të justifikohen para qytetarëve, duke treguar se nuk janë fajtorë për situatën. Megjithatë, duket qartë se vullneti për të shkuar në zgjedhje është më i madh sesa për të gjetur një zgjidhje. Në fakt, vullneti për zgjidhje është pothuajse zero. Këto takimet ndërpartiake më shumë po mbahen për të menaxhuar opinionin publik, sepse askush nuk mund të thotë se nuk ka bërë asgjë”, ka thënë ai.
Tutje, ai ka analizuar edhe arsyet pse partitë politike mund të preferojnë zgjedhjet.
Sipas tij, Lëvizja Vetëvendosje mund të synojë rritje të mëtejshme elektorale, duke llogaritur në përfitime nga kriza politike dhe mundësinë për të arritur shumicë më të madhe parlamentare.
Ndërkaq, Partia Demokratike e Kosovës mund të shpresojë në rënie të mbështetjes për Vetëvendosjen dhe në përfitim të votave nga elektorati i pakënaqur.
Smajljaj theksoi se edhe Lidhja Demokratike e Kosovës mund të shohë një mundësi rritjeje, veçanërisht nëse ndodh një rikthim i mundshëm i Vjosa Osmani në këtë parti, çka sipas tij mund ta fuqizonte LDK-në në skenën politike.
“Këto janë kalkulimet aktuale të partive, të cilat po i shohin zgjedhjet si më fitimprurëse për vota, duke anashkaluar tërësisht interesin e vendit dhe qytetarëve”, ka përfunduar Smajljaj.
