Politologu, Avdi Smajljaj ka vlerësuar se listat e kandidatëve për deputetë të subjekteve politike për zgjedhjet e parakohshme parlamentare të 7 qershorit nuk sjellin ndryshime të mëdha në skenën politike.
Në emisionin “Info Nata” në Tëvë1, Smajljaj ka theksuar se listat përmbajnë vetëm disa “freskime”, ndërsa pjesa më e madhe e kandidatëve janë deputetë që kanë qenë edhe në legjislaturat e kaluara.
“Listat kanë pësuar vetëm pak përmirësime dhe freskime, ndërsa pjesa më e madhe dominohet nga deputetë që kanë qenë edhe në legjislaturën e kaluar, por edhe në ato paraprake. Këta deputetë nuk arritën që për një vit t’i japin vendit institucione funksionale. Po ashtu, kemi parë se një pjesë e madhe e tyre kanë qenë pothuajse inekzistentë, duke vepruar kryesisht në bazë të direktivave që marrin nga liderët e partive”, ka deklaruar ai.
Sipas tij, përbërja e listave nuk është shumë domethënëse nëse deputetët vazhdojnë të mos kenë pavarësi në vendimmarrje.
Ai ka shtuar se Kuvendi në legjislaturat e fundit është dëshmuar ndër më të dobëtit, duke mos arritur t’i sigurojë vendit institucione funksionale, përfshirë edhe zgjedhjen e presidentit.
Smajljaj ka theksuar se Kosova ka nevojë për deputetë me integritet dhe autonomi politike, të cilët interesin e qytetarëve dhe shtetit e vendosin para interesave të liderëve partiakë.
“Përbërja apo gjithpërfshirja në lista nuk është shumë domethënëse, pasi deputetët sërish do të veprojnë në bazë të direktivave partiake. Në bazë të kësaj, mund të themi se Kuvendi, në legjislaturat e fundit, është dëshmuar ndër më të dobëtit, duke mos arritur t’i japë vendit president dhe institucione funksionale.Është shumë e rëndësishme që vendi të përfaqësohet nga figura që janë zë i qytetarëve, mendojnë për interesin e tyre dhe kanë autonomi e pavarësi vepruese brenda Kuvendit. Sikur të ishte kështu, edhe liderët e partive do ta kishin më të vështirë ta bllokonin vendin, pasi në Kuvend do të kishte deputetë me integritet, të cilët interesin e shtetit dhe të qytetarëve e vendosin para interesit të liderit partiak”, ka thënë ai.
