Në konferencën e sotme për shtyp, trajneri i Liverpoolit, Arne Slot, foli për ndeshjen e së nesërmes kundër Sunderlandit, por vëmendja e gazetarëve ishte e përqendruar te statusi i Mohamed Salahut.
Sulmuesi egjiptian e ndoqi nga stoli takimin e fundit në Anfield kundër Nottingham Forest (0:3), pavarësisht se nuk kishte asnjë lëndim. Pas ndeshjes, Salah shprehu pakënaqësinë e tij për vendimin e trajnerit që ta linte mes rezervistëve.
Egjiptiani edhe në sfidën ndaj West Ham ishte në stol dhe nuk u fut fare në fushë.
Në deklaratën e tij, Slot mohoi kategorikisht se mes tyre ka ndonjë problem, por theksoi se e kupton plotësisht reagimin e lojtarit.
“Ky është reagim normal nga një futbollist që është mjaftueshëm i mirë për të luajtur për ne. E them këtë me shumë respekt, sepse ai ka qenë i jashtëzakonshëm për klubin për kaq vite dhe do të vazhdojë të jetë edhe në të ardhmen”, tha Slot.
Ai shtoi se pakënaqësia e lojtarit për mosaktivizim është krejt natyrale.
“Sigurisht që nuk ishte i lumtur që nuk luajti titullar. Nuk ishte i vetmi, dhe kjo është normale. Por mënyra se si u soll ishte ajo e një profesionisti të vërtetë. Ai ishte mbështetje e madhe për shokët e ekipit”.
Slot vlerësoi edhe sjelljen dhe disiplinën e Salahut në seancat e fundit stërvitore.
“Ai u soll shumë mirë gjatë gjithë ditës dhe po ashtu edhe dje në stërvitje. Nuk mund të jesh i gatshëm të luash çdo tre ditë në një nivel kaq të lartë nëse ndjek emocionet. Ai është shumë i disiplinuar, di si të qëndrojë në formë, dhe pavarësisht nëse luan mirë, keq, apo nuk luan fare, ai është gjithmonë profesionisti më i mirë. Kështu ka qenë edhe në dy ditët e fundit”, përfundoi Slot.
