Sllovenia shpalli të enjten persona non grata dy ministra izraelitë të krahut të djathtë – Itamar Ben-Gvir dhe Bezalel Smotrich – duke u bërë vendi i parë i Bashkimit Evropian që ndërmerr një hap të tillë.
Lajmin e bëri të ditur ministrja e Jashtme sllovene, Tanja Fajon.
Qeveria sllovene akuzon ministrin izraelit të sigurisë kombëtare, Ben-Gvir, dhe ministrin e financave, Smotrich – të dy kolonë në Bregun Perëndimor – për deklarata “gjenocidale” dhe nxitje të dhunës kundër palestinezëve.
Fajon tha se vendimi u mor pasi ministrat e jashtëm të BE-së nuk arritën të bien dakord për një qëndrim të përbashkët ndaj Izraelit, në takimin e tyre të fundit në Bruksel.
“Sot, qeveria miratoi një nga masat e para kombëtare – shpalljen e dy ministrave izraelitë… persona të padëshiruar në Republikën e Sllovenisë. Kjo është një masë e parë e këtij lloji në Bashkimin Evropian. Po hapim rrugë të reja”, tha Fajon në një konferencë për media.
Qeveria izraelite nuk ka reaguar menjëherë, por më herët ka mohuar akuzat për gjenocid në Gaza, duke thënë se po vepron në vetëmbrojtje pas sulmit të Hamasit më 7 tetor 2023.
