Udhëheqësit e partive politike në veri të Irlandës, Skoci dhe Uells i kanë kërkuar kryeministrit britanik Keir Starmer të thërrasë Parlamentin dhe të vendosë sanksione ndaj Izraelit për shkak të luftës në Gaza.
Në një letër të përbashkët, politikanët i bënë thirrje Starmer të “veprojë tani” për të ushtruar presion mbi Izraelin që t’i japë fund fushatës së tij ushtarake.
“Katastrofa humanitare që po ndodh në Gaza është si e shkaktuar nga njeriu ashtu edhe e shmangshme”, thuhej në letër, citon Al Jazeera.
Ajo i bënte thirrje Mbretërisë së Bashkuar të përdorte “ndikimin e saj diplomatik për të nxitur shpërndarjen pa pengesa të ushqimit, ujit, ilaçeve dhe ndihmës humanitare për popullin e Gazës”.
Nënshkruesit kërkuan gjithashtu “një ndërprerje të menjëhershme të të gjitha shitjeve të armëve Izraelit” dhe mbështetje për “hetime të pavarura ndërkombëtare për krime të dyshuara lufte, krime kundër njerëzimit dhe akte gjenocidi në Gaza”.
“Ju bëjmë thirrje të veproni me vendosmëri duke kundërshtuar urinë e shkaktuar nga njeriu, vrasjen masive të fëmijëve dhe sulmin më të gjerë ndaj jetës civile. Historia do të kujtojë nëse zgjodhëm të heshtnim apo të qëndronim në anën e njerëzimit”, thuhej në letër.
