Pjesëtarë të shoqërisë civile po shprehen skeptik për të ardhmen e procesit të dialogut ndërmjet Kosovës dhe Serbisë. Sipas tyre nuk mund të ketë normalizim të marrëdhënieve mes shteteve kur dy liderët nuk kanë komunikim njeri-tjetrin.
Ka një kohë të gjatë që procesi i dialogut mes Kosovës dhe Serbisë nuk po shënon progres.
Ndërmjetësi i këtij procesi, Miroslav Lajçak, nuk po arrin t’i bind palët që të fillojnë me zbatimin e marrëveshjeve.
Ndërsa ka mbi një vit që kryeministri i Kosovës, Albin Kurti dhe presidenti i Serbisë, Aleksandar Vuçiq nuk janë takuar në Bruksel.
Kjo situatë nga drejtori i organizatës AKTIV, Miodrag Miliçeviq, po shihet si mungesë besimi në dialog nga Kosova dhe Serbia.
“Retorikë e ashpër po përdorët në publik nga të dy liderët. Kjo tregon më së miri se pak palët nuk kanë besim në procesin e dialogut. Për një kohë të gjatë gjërat po sillen në rrethin e njëjtë. Nuk shoh vullnet nga asnjëra palë për zbatimin e marrëveshjeve të arritura në Bruksel. Duhet t’i bëhet një rivlerësim të gjithë procesit dhe të sigurohet garanci nga palët se do të nisin më zbatimin e marrëveshjeve. Garanci dhe llogari duhet të japë edhe ndërmjetësuesi i procesit të dialogut, Miroslav Lajçak. Duhet shumë më shumë angazhim që gjërat të shkojnë në rrugën e duhur”, thotë ai.
Skeptike sa i përket procesit të dialogut shprehet edhe aktivistja për të drejtat e njeriut, Sofija Todoroviq.
Ajo thotë se nuk mund të priten rezultate ne dialog, kur të dy liderët nuk kanë komunikim me njëri-tjetrin.
“Nuk mund të ketë dialog të shëndoshë ndërmjet Kosovës dhe Serbisë kur të dy liderët nuk kanë komunikim më njëri-tjetrin. Më shumë po duket si një dialog hibrid që disi po e ndërmjetëson Bashkimi Evropian. Ta them të drejtën nuk po shohim vullnet të sinqertë nga asnjëra palë për gjetur një zgjidhje. Duhet të ketë angazhim më të madh nga komuniteti ndërkombëtar që situata të normalizohet. Kam frikë se situata politike e tensionuar po ndikon edhe tek qytetarët të cilët duan qetësi në fund të ditës”, shprehet Todoroviq.
Nga Brukseli ende nuk kanë njoftuar se kur do të zhvillohet takimi i radhës në nivel të kryenegociatorëve në kuadër të dialogut Kosovë-Serbi, përkundër paralajmërimit të përfaqësuesit të BE-së për dialogun, Miroslav Lajçak, se takimi do të ndodhë gjatë muajit tetor.
